بے خبر کو میرے عالم کی خبر ہو تو گئی

بے خبر کو میرے عالم کی خبر ہو تو گئی

ظلمتِ شام الم ڈھل کے سحر ہو تو گئی

سن رہا ہوں کہ وہ آتے ہیں کلیجہ تھامے

آہ شرمندۂ تاثیر و اثر ہو تو گئی

دل کا یہ حال ہے جیسے کہ اسے ہوش نہیں

اس طرف یار کی دزدیدہ نظر ہو تو گئی

ایک طوفاں ہے کہ امڈا سا چلا آتا ہے

غم کی تکمیل میرے دیدۂ تر ہو تو گئی

اس کا کیوں رنج کریں غم میں کٹی عمر اپنی

دل نے جس حال میں چاہا تھا بسر ہوتو گئی

اب تو حسرت ہے نہ ارماں ہے نہ امید نہ یاس

ہستئی قلبِ حزیں زیر و زبر ہو تو گئی

بے بلائے چلے آئے وہ مری بالیں پر

دیکھ بہزادؔ مری شام سحر ہو تو گئی