پہلو میں کچھ نہیں دل ناکام کیا ہوا

پہلو میں کچھ نہیں دل ناکام کیا ہوا

کیا جانے میرے ضبط کا انجام کیا ہوا

کیوں ماند سا ہے چاند ستارے ہیں کیوں اداس

میں بدنصیب تھا تجھے اے شام کیا ہوا

دل میں نہیں ہے داغ تمنا کا کچھ نشاں

ساقی نے جو دیا تھا وہ انعام کیا ہوا

میں ہوں خطائے عشق کا مجرم خوشا نصیب

انعام مل رہا ہے یہ الزام کیا ہوا

میں کھو گیا تو شب کی لطافت بھی کھو گئی

میرے خدا یہ آج سر شام کیا ہوا

اب ہم ہیں اور ہجر کی آفت نصیبیاں

وہ سلسلہ وہ نامہ و پیغام کیا ہوا

بہزادؔ دردِ عشق کے قربان جائیے

مشہور ہو گیا ہوں میں بدنام کیا ہوا