کیا خبر تھی کسی کافر سے محبت ہو گی

کیا خبر تھی کسی کافر سے محبت ہو گی

کفر کی بھی مرے ایماں کو ضرورت ہو گی

راہزن نے مجھے ٹھیرا کے یہ رستے میں کہا

راہ ایسی ہے کہ رہبر کی نہ حاجت ہو گی

بے پئے مست ہوں میخانے کا ہے مجھ سے بھرم

میں جو پی لوں گا تو ساقی کو ندامت ہو گی

آج کل صحنِ گلستاں میں ہے جس بات کی دھوم

میرا عالم مری مستی، مری وحشت ہو گی

شوقِ دیدار مری تاب نظر لائے گا کون

آنکھ اٹھاؤں گا تو جلووں کو ندامت ہو گی

میں نے گھبرا کے اگر کام تصور سے لیا

شامِ غم میں ہی عیاں صبحِ مسرت ہو گی

کہہ دو خوشیوں سے کہ بہزادؔ مجھے کر دو معاف

میں سمجھتا ہوں مجھے غم سے نہ فرصت ہو گی