تمہیں دل میں رکھا ہے اپنا سمجھ کر

تمہیں دل میں رکھا ہے اپنا سمجھ کر

غم زندگی کا سہارا سمجھ کر

بہت دن رہی چشم مشتاق حیران

ترے عکس کو تیرا جلوہ سمجھ کر

اسی سمت ہے جوش پر موج طوفان

جدھر بڑھ رہا ہوں کنارا سمجھ کر

نگاہیں مری اے جمال سراپا

تجھے دیکھ لیتی ہیں اپنا سمجھ کر

بڑھانا پڑا مجھ کو دست تمنا

نگاہ کرم کا اشارا سمجھ کر

کہو کفر سے اپنا دامن بچائے

کہ ہم نے کیا ہے یہ سجدہ سمجھ کر

یہی ہے در یار یا منزل دل

یہاں آئے بہزادؔ تم کیا سمجھ کر