tere dar pe sar jis ne ragDa nahin hai

tire dar pe sar jis ne ragḌā nahīñ hai

vo banda magar koī banda nahīñ hai

dikhā.eñge tujhe kis tarah dil ham apnā

ki ye apne qaabū meñ aatā nahīñ hai

husain haiñ hazāroñ magar ham se suniye

koī aap sā dekhā-bhālā nahīñ hai

raqīboñ ne āḳhir use maar Daalā

mirā nāma-bar aaj lauTā nahīñ hai

mire ḳhāna-e-dil meñ aa kar raho tum

ye vo ghar hai jis kā kirāya nahīñ hai

ye kyā aa.e the tum ki dam bhar na Thahre

sitam hai qayāmat hai aanā nahīñ hai

na dekhā tumheñ jis ne ek baar ai jaañ

ḳhudā kī qasam aañkh vaalā nahīñ hai

phañsātā hai 'āshiq ko ye 'ishq har dam

kisī par koī aap martā nahīñ hai

havā aisī badlī zamāna kī yā-rab

kisī par kisī ko bharosā nahīñ hai

vo muñh pher kar aaj yuuñ jā rahe haiñ

ki ham ne kabhī un ko dekhā nahīñ hai

ruḳh-e-yār ko aap dekheñge kyūñkar

'bashīr' aap kā aisā rutba nahīñ hai

tere dar pe sar jis ne ragDa nahin hai

wo banda magar koi banda nahin hai

dikhaenge tujhe kis tarah dil hum apna

ki ye apne qabu mein aata nahin hai

husain hain hazaron magar hum se suniye

koi aap sa dekha-bhaala nahin hai

raqibon ne aaKHir use mar Dala

mera nama-bar aaj lauTa nahin hai

mere KHana-e-dil mein aa kar raho tum

ye wo ghar hai jis ka kiraya nahin hai

ye kya aae the tum ki dam bhar na Thahre

sitam hai qayamat hai aana nahin hai

na dekha tumhein jis ne ek bar ai jaan

KHuda ki qasam aankh wala nahin hai

phansata hai 'ashiq ko ye 'ishq har dam

kisi par koi aap marta nahin hai

hawa aisi badli zamana ki ya-rab

kisi par kisi ko bharosa nahin hai

wo munh pher kar aaj yun ja rahe hain

ki hum ne kabhi un ko dekha nahin hai

ruKH-e-yar ko aap dekhenge kyunkar

'bashir' aap ka aisa rutba nahin hai