ترے در پہ سر جس نے رگڑا نہیں ہے

ترے در پہ سر جس نے رگڑا نہیں ہے

وہ بندہ مگر کوئی بندہ نہیں ہے

دکھائیں گے تجھے کس طرح دل ہم اپنا

کہ یہ اپنے قابو میں آتا نہیں ہے

حسین ہیں ہزاروں مگر ہم سے سنیے

کوئی آپ سا دیکھا بھالا نہیں ہے

رقیبوں نے آخر اسے مار ڈالا

مرا نامہ بر آج لوٹا نہیں ہے

مرے خانۂ دل میں آ کر رہو تم

یہ وہ گھر ہے جس کا کرایہ نہیں ہے

یہ کیا آئے تھے تم کہ دم بھر نہ ٹھہرے

ستم ہے قیامت ہے آنا نہیں ہے

نہ دیکھا تمہیں جس نے ایک بار اے جاں

خدا کی قسم آنکھ والا نہیں ہے

پھنساتا ہے عاشق کو یہ عشق ہر دم

کسی پر کوئی آپ مرتا نہیں ہے

ہوا ایسی بدلی زمانہ کی یارب

کسی پر کسی کو بھروسا نہیں ہے

وہ منہ پھیر کر آج یوں جا رہے ہیں

کہ ہم نے کبھی ان کو دیکھا نہیں ہے

رخ یار کو آپ دیکھیں گے کیونکر

بشیرؔ آپ کا ایسا رتبہ نہیں ہے