رنگینیاں جو تھیں مری بزم خیال میں

رنگینیاں جو تھیں مری بزم خیال میں

سب صرف ہوگئیں تری شان جمال میں

آیا بہ شکل عیش یہ کافر ہزار بار

آئے نہ اہل دل غم ہستی کی چال میں

ہے بے نیاز دور فلک کا ئنات عشق

یاں کوئی تفرقہ نہیں ماضی و حال میں

برباد ہم کو ان کی کدورت نے کر دیا

ارمان دفن ہوگئے گرد و ملال میں

یہ راہ وہ نہیں کہ جسے روک دیں رقیب

جب جانیں وہ نہ آئیں ہمارے خیال میں

ان کو پسند آ گیا لہجہ کلیم کا

لکنت سے کچھ مدد ہی ملی بول چال میں