تیری الفت شعبدہ پرواز ہے

تیری الفت شعبدہ پرواز ہے

آرزو گر ہے تمنا ساز ہے

پھر حدیث عشق کا آغاز ہے

آج پھر گویا زبان راز ہے

گنج اسرار ازل ہے باغ دہر

پتا پتا دفتر صد راز ہے

جان دے دی ان پہ اور زندہ رہے

اپنے مرنے کا نیا انداز ہے

ہوشیار اے ناوک افگن ہشیار

طائر جاں مائل پرواز ہے

رخصت اے عقل و خرد ہوش و حواس

شوق وصل یار کا آغاز ہے

میرے نالہ سن کے فرماتے ہیں وہ

یہ اسی کی دکھ بھری آواز ہے

جس کو سب سمجھے ہیں دشت کربلا

وہ تو میدان نیاز و ناز ہے

ذرہ ذرہ میں عیاں ہونے کے بعد

آج تک راز حقیقت راز ہے

آپ جانچے مجمع عشاق میں

ان میں بیدمؔ سا کوئی جاں باز ہے