bhare motī haiñ goyā tujh dahan meñ

bhare motī haiñ goyā tujh dahan meñ

ki dur-rezī tū kartā hai suḳhan meñ

bahār-ārā vahī hai har chaman meñ

usī kī bū hai nasrīn-o-saman meñ

na phir īdhar udhar nāhaq bhaTaktā

ki hai vo jalva-gar tere hī man meñ

jahāñ vo hai nahīñ vaañ kufr o islām

abas jhagḌā hai shaiḳh o barhaman meñ

huī jaatī hai paanī sharm se sham.a

magar vo maah aayā anjuman meñ

chhuḌāyā thā nipaT mushkil se phir aah

dil aTkā us kī zulf-e-pur-shikan meñ

junūñ ne dast-kārī aisī bhī kī

na thā goyā garebāñ pairahan meñ

marā jaatā hai jis ġhairat meñ dariyā

girā kis kā hai dil chāh-e-zaqan meñ

magar parvāna jal kar ho gayā ḳhaak

ki ro-ro sham.a jaltī hai lagan meñ

jo sunte the dam-e-īsā kā e.ajāz

so dekhā ham ne vo tere suḳhan meñ

na dekhā us parī-jalva ko 'bedār'

rahā mashġhūl tū yaañ mā-o-man meñ

bhare motī haiñ goyā tujh dahan meñ

ki dur-rezī tū kartā hai suḳhan meñ

bahār-ārā wahī hai har chaman meñ

usī kī bū hai nasrīn-o-saman meñ

na phir īdhar udhar nāhaq bhaTaktā

ki hai wo jalwa-gar tere hī man meñ

jahāñ wo hai nahīñ wañ kufr o islām

abas jhagḌā hai shaiḳh o barhaman meñ

huī jatī hai panī sharm se shama

magar wo mah aayā anjuman meñ

chhuḌāyā thā nipaT mushkil se phir aah

dil aTkā us kī zulf-e-pur-shikan meñ

junūñ ne dast-kārī aisī bhī kī

na thā goyā garebāñ pairahan meñ

marā jatā hai jis ġhairat meñ dariyā

girā kis kā hai dil chāh-e-zaqan meñ

magar parwāna jal kar ho gayā ḳhak

ki ro-ro shama jaltī hai lagan meñ

jo sunte the dam-e-īsā kā eajāz

so dekhā hum ne wo tere suḳhan meñ

na dekhā us parī-jalwa ko 'bedār'

rahā mashġhūl tū yañ mā-o-man meñ