نام کی تیرے جھلک تک نہیں افسانے میں

نام کی تیرے جھلک تک نہیں افسانے میں

ہوشیاری ہے غضب کی ترے دیوانے میں

آتش حسن کے جلوے ہیں اگر شمع کے ساتھ

آتش عشق کے شعلے بھی ہیں پروانے میں

آہ اک کھینچ کے اب چپ ہوں کہ ممکن نہ ہوا

اختصار اور غمِ عشق کے افسانے میں

دل شکستہ تھا بھلا اشک مرے کیا تھمتے

مئے رکی ہے کہیں ٹوٹے ہوئے پیمانے میں

بھر دے خوش رنگیٔ مئے بھی نگہ لطف کے ساتھ

اپنے پیمانے سے ساقی مرے پیمانے میں

جلوۂ حسن کی تابانی پیہم کے نثار

بجلیاں کوند رہی ہیں مرے کاشانے میں

تیرے وحشی کی نگاہوں سے تو کوئی دیکھے

بستیاں سیکڑوں آباد ہیں ویرانے میں

قدر دل خاک نہیں ورنہ میں پاتا ہوں نہادؔ

عقل کونین آہ ہشیار سے دیوانے میں