عشق کے ہاتھوں غم فرقت کا ساماں دیکھ کر

عشق کے ہاتھوں غم فرقت کا ساماں دیکھ کر

چونک چونک اٹھتا ہوں میں خواب پریشاں دیکھ کر

سانس جب لیتا ہوں میں رہ رہ کے تھراتی ہے لو

دل لرزتا ہے چراغ شام ہجراں دیکھ کر

آنے والے قبر پر ان بکھرے بالوں کو سمیٹ

روح گھبرائی مری زلف پریشاں دیکھ کر

اشک گرتے ہیں ستارے ٹوٹتے ہیں باربار

کانپتا ہے دل شب تاریک ہجراں دیکھ کر

ہے بہت نزدیک اس منزل سے رسوائی کی حد

چاکِ داماں سےملے چاکِ گریباں دیکھ کر

آج اپنی کامیابی پر محبت کو ہے ناز

مسکرا اٹھا کوئی چاک گریباں دیکھ کر

زلزلے میں ہے زمیں دنیائے دل کی اے نہادؔ

صبح محشر کو شریک شام ہجراں دیکھ کر