chubhe jab dil mein Khaar-e-ishq phir kamtar nikalte hain

chubhe jab dil meñ ḳhār-e-ishq phir kamtar nikalte haiñ

nikalte haiñ agar tū jaan hī le kar nikalte haiñ

tark-e-nāvak jo siine meñ kabhī chubh kar nikalte haiñ

to ban kar ḳhuun armān-e-dil-e-muztar nikalte haiñ

kidhar kā qasd hai kis kā muqaddar aaj jaagā hai

talab hotā hai shāna ā.īna-e-zevar nikalte haiñ

tumhārā tiir rasta rok kar siine meñ baiThā hai

jo naale bhī nikalte haiñ to ruk-ruk kar nikalte haiñ

vo kahte haiñ ajal hotī hai jis kī ham pe martā hai

qazā aatī hai jab chyūñTī kī us ke par nikalte haiñ

hasīnoñ ko jo dekho shakl kaisī bholī hotī hai

TaTolo dil agar un ke to vo patthar nikalte haiñ

lagā dī garmī-e-ulfat ne kaisī aag siine meñ

ki āñkhoñ se jo aañsū kī jagah aḳhgar nikalte haiñ

koī dekhe zarā 'āfāq' kī us vaqt kaifiyat

kabhī hazrat jo sahbā-e-suḳhan pī kar nikalte haiñ

chubhe jab dil mein KHar-e-ishq phir kamtar nikalte hain

nikalte hain agar tu jaan hi le kar nikalte hain

tark-e-nawak jo sine mein kabhi chubh kar nikalte hain

to ban kar KHun arman-e-dil-e-muztar nikalte hain

kidhar ka qasd hai kis ka muqaddar aaj jaga hai

talab hota hai shana aaina-e-zewar nikalte hain

tumhaara tir rasta rok kar sine mein baiTha hai

jo nale bhi nikalte hain to ruk-ruk kar nikalte hain

wo kahte hain ajal hoti hai jis ki hum pe marta hai

qaza aati hai jab chyunTi ki us ke par nikalte hain

hasinon ko jo dekho shakl kaisi bholi hoti hai

TaTolo dil agar un ke to wo patthar nikalte hain

laga di garmi-e-ulfat ne kaisi aag sine mein

ki aankhon se jo aansu ki jagah aKHgar nikalte hain

koi dekhe zara 'afaq' ki us waqt kaifiyat

kabhi hazrat jo sahba-e-suKHan pi kar nikalte hain