ملتے ہی بیباک تھی وہ آنکھ شرمائی ہوئی

ملتے ہی بیباک تھی وہ آنکھ شرمائی ہوئی

پھر گئی پچھتا کے پلکوں تک حیا آتی ہوئی

ہر ادا مستانہ سر سے پاؤں تک چھائی ہوئی

اف تری کافر جوانی جوش پر آئی ہوئی

مجھ کو یہ دعویٰ کوئی تیرے سوا دل میں نہیں

ان کو یہ الزام اچھی قیدِ تنہائی ہوئی

یہ ملا ذکرِ قیامت پر قیامت کا جواب

کیا اٹھے گی وہ ہماری ٹھوکریں کھائی ہوئی

بھولی صورت پر تری تصویر کا وہ بانکپن

لب پہ ظالم ہے تبسم دل میں اترائی ہوئی

دیکھ کر قاتل کی آمد داغؔ دل میں شاد شاد

اور غم خواروں کی منہ پر مردنی چھائی ہوئی