ہم نے ان کے سامنے اول تو خنجر رکھ دیا

ہم نے ان کے سامنے اول تو خنجر رکھ دیا

پھر کلیجہ رکھ دیا دل رکھ دیا سر رکھ دیا

قطرۂ خون جگر سے کی تواضع عشق کی

سامنے مہمان کے جو تھا میسر رکھ دیا

منصفی ہو تو غضب نا منصفی ہو تو ستم

اس نے میرا فیصلہ موقوف مجھ پر رکھ دیا

کہتے ہیں بوئے وفا آتی ہے ان پھولوں میں آج

دل جو ہم نے لالہ و گل میں ملا کر رکھ دیا

زندگی میں پاس سے اک دم نہ ہوتی تھی جدا

قبر میں تنہا مجھے یاروں نے کیوں کر رکھ دیا

زلف خالی ہاتھ خالی کس جگہ ڈھونڈوں اسے

تم نے دل لے کر کہاں اے بندہ پرور رکھ دیا

شوق بھی ہے وہم بھی ہے کیا کروں اے نامہ بر

کل جو لکھا کاٹ کر وہ آج دفتر رکھ دیا

داغؔ کی شامت جو آئی اضطراب شوق میں

حال دل کمبخت نے سب ان کے منہ پر رکھ دیا