dahan hai chhoTa kamar hai patli suDaul bazu jamal achchha

dahan hai chhoTā kamar hai patlī suDaul baazū jamāl achchhā

tabī'at apnī bhī hai maze kī pasand achchhī ḳhayāl achchhā

in āñkhoñ meñ phirtī hai vo sūrat ye chaltā-phirtā jamāl achchhā

milā-julā hai vo 'āshiqoñ se ye mel pyārā visāl achchhā

nigāh kā ruḳh to merī jānib magar ye dil aur hī taraf hai

chalan tumhārā chhupā nahīñ hai mujhī se chalte ho chaal achchhā

ham apnī hastī miTā rahe haiñ us kī mashq ab baḌhā rahe haiñ

ye zamzame lab par aa rahe haiñ kamāl se hai zavāl achchhā

jabīñ hamārī tumhārā chaukhaT hamārī āñḳheñ tumhārā jalva

tumhārī sīrat hamārī sūrat jo yuuñ mileñ to visāl achchhā

hamārī taqdīr jaag uTThī ye din dikhā.e ki aap aa.e

ye roz achchhā ye raat achchhī ye maah achchhā ye saal achchhā

ġham-e-mohabbat hai ḳhvān-e-ne.amat isī kī talḳhī hai shahd-e-jannat

ye rañj hai ḳhush-gavār 'akbar' ye haal achchhā vabāl achchhā

dahan hai chhoTa kamar hai patli suDaul bazu jamal achchha

tabi'at apni bhi hai maze ki pasand achchhi KHayal achchha

in aankhon mein phirti hai wo surat ye chalta-phirta jamal achchha

mila-jula hai wo 'ashiqon se ye mel pyara visal achchha

nigah ka ruKH to meri jaanib magar ye dil aur hi taraf hai

chalan tumhaara chhupa nahin hai mujhi se chalte ho chaal achchha

hum apni hasti miTa rahe hain us ki mashq ab baDha rahe hain

ye zamzame lab par aa rahe hain kamal se hai zawal achchha

jabin hamari tumhaara chaukhaT hamari aanKHen tumhaara jalwa

tumhaari sirat hamari surat jo yun milen to visal achchha

hamari taqdir jag uTThi ye din dikhae ki aap aae

ye roz achchha ye raat achchhi ye mah achchha ye sal achchha

gham-e-mohabbat hai KHwan-e-neamat isi ki talKHi hai shahd-e-jannat

ye ranj hai KHush-gawar 'akbar' ye haal achchha wabaal achchha