dil ke har goshe mein tu ho aashiqi aisi to ho

dil ke har goshe meñ tū ho āshiqī aisī to ho

maiñ terā ho kar rahūñ ab zindagī aisī to ho

merā dil ban jaa.e asrār-e-mohabbat kā amiiñ

tere dāman se mujhe vābastagī aisī to ho

hasrat-o-armāñ kā dil se har nishāñ jaatā rahe

jis meñ ho terī razā merī ḳhushī aisī to ho

zindagī-bhar pā-e-jānāñ hī pe sar jhuktā rahe

bandagī kā lutf jab hai bandagī aisī to ho

be-niyāz-e-ġham guzar jaa.eñ har ek manzil se ham

ishq kī rāhoñ meñ dil ko āgahī aisī to ho

manzil-e-maqsūd baḌh kar ḳhud-ba-ḳhud chūme qadam

kam se kam azm-o-yaqīñ meñ puḳhtagī aisī to ho

sunñe vāloñ ke diloñ ko baḳhsh de nūr-e-yaqīn

mere qisse meñ tumhārī raushnī aisī to ho

zindagī-bhar hosh kā aalam na ho mujh ko nasīb

chashm-e-mast-e-nāz se bāda-kashī aisī to ho

merī har laġhzish pe aa jaa.e mere saaqī ko pyaar

hosh se 'sādiq' mujhe begāngī aisī to ho

dil ke har goshe mein tu ho aashiqi aisi to ho

main tera ho kar rahun ab zindagi aisi to ho

mera dil ban jae asrar-e-mohabbat ka amin

tere daman se mujhe wabastagi aisi to ho

hasrat-o-arman ka dil se har nishan jata rahe

jis mein ho teri raza meri KHushi aisi to ho

zindagi-bhar pa-e-jaanan hi pe sar jhukta rahe

bandagi ka lutf jab hai bandagi aisi to ho

be-niyaz-e-gham guzar jaen har ek manzil se hum

ishq ki rahon mein dil ko aagahi aisi to ho

manzil-e-maqsud baDh kar KHud-ba-KHud chume qadam

kam se kam azm-o-yaqin mein puKHtagi aisi to ho

sunne walon ke dilon ko baKHsh de nur-e-yaqin

mere qisse mein tumhaari raushni aisi to ho

zindagi-bhar hosh ka aalam na ho mujh ko nasib

chashm-e-mast-e-naz se baada-kashi aisi to ho

meri har laghzish pe aa jae mere saqi ko pyar

hosh se 'sadiq' mujhe begangi aisi to ho