دل کے ہر گوشے میں تو ہو عاشقی ایسی تو ہو

دل کے ہر گوشے میں تو ہو عاشقی ایسی تو ہو

میں تیرا ہو کر رہوں اب زندگی ایسی تو ہو

میرا دل بن جائے اسرار محبت کا امیں

تیرے دامن سے مجھے وابستگی ایسی تو ہو

حسرت و ارماں کا دل سے ہر نشاں جاتا رہے

جس میں ہو تیری رضا میری خوشی ایسی تو ہو

زندگی بھر پائے جاناں ہی پہ سر جھکتا رہے

بندگی کا لطف جب ہے بندگی ایسی تو ہو

بے نیاز غم گزر جائیں ہر ایک منزل سے ہم

عشق کی راہوں میں دل کو آگہی ایسی تو ہو

منزل مقصود بڑھ کر خودبخود چومے قدم

کم سے کم عزم و یقیں میں پختگی ایسی تو ہو

سننے والوں کے دلوں کو بخش دے نور یقین

میرے قصے میں تمہاری روشنی ایسی تو ہو

زندگی بھر ہوش کا عالم نہ ہو مجھ کو نصیب

چشم مست ناز سے بادہ کشی ایسی تو ہو

میری ہر لغزش پہ آ جائے میرے ساقی کو پیار

ہوش سے صادقؔ مجھے بے گانگی ایسی تو ہو