دل نہ ٹھہرے گا تو مر جاؤں گا میں دل کے لیے

دل نہ ٹھہرے گا تو مر جاؤں گا میں دل کے لیے

آپ مشکل میں نہ پڑیے مری مشکل کے لیے

ان کا سنگ آستاں پا کر بھلا جاؤں کہاں

آخری پتھر ہے یہ بس میری منزل کے لیے

زندگی تھی موت کا سامان تھی یا موت تھی

آپ کی پہلی نظر کیا تھی مرے دل کے لیے

واہ وا اے زور طوفان حوادث واہ وا

ہم بھنور کے واسطے خاشاک ساحل کے لیے

آج چمکا ہے ستارہ طالبان دید کا

آپ کیا نکلے ہیں سیر ماہ کامل کے لیے

مجھ سے کوئی حسن کی تعریف پوچھے تو کہوں

نور آنکھوں کے لیے ہے آرزو دل کے لیے

بندہ بننا چاہتا ہوں اور بندہ ہوں صفیؔ

کر رہا ہوں کوششیں تحصیل حاصل کے لیے