دنیا میں کوئی اہل نظر کیا رہا نہیں

دنیا میں کوئی اہل نظر کیا رہا نہیں

وہ سامنے ہے اور کوئی دیکھتا نہیں

ایسا بھی انقلاب جہاں میں ہوا نہیں

دن ہو گیا ہے اور اندھیرا گیا نہیں

تم نے بھی کچھ سنا ہے مرے دل کا ماجرا

ہے ہر زباں پہ اور کسی نے کہا نہیں

مانا کہ میں زمانے میں مجبور ہوں مگر

یہ خیر ہے کہ تم بھی کسی کے خدا نہیں

آج اپنے آشیانے میں بلبل ہے بے وطن

صیاد کے بھی عہد میں ایسا ہوا نہیں

ایمان ہے مرا تری جنت پر اے خدا

لیکن یہ میرے خون جگر کا صلا نہیں

میکشؔ مرا بیان زمانے نے سن لیا

ہے جس کا ذکر صرف اسی نے سنا نہیں