ek do qadam bhi jo teri rahon mein aa gae

ik do qadam bhī jo tirī rāhoñ meñ aa ga.e

vo ḳhush-nasīb terī panāhoñ meñ aa ga.e

husn-o-jamāl-e-dost kā aalam na pūchhiye

jalva simaT ke merī nigāhoñ meñ aa ga.e

jiine na dete ham ko zamāne ke hādse

achchhā huā ki terī panāhoñ meñ aa ga.e

dil ko matā.a-e-rāhat-o-taskīn mil ga.ī

vo muskurā ke jab bhī nigāhoñ meñ aa ga.e

zarf-e-nazar kī baat hai ham un kī bazm se

kaif-e-hayāt le ke nigāhoñ meñ aa ga.e

dair-o-haram meñ chal diye dair-o-haram ke log

jo riñd the vo terī panāhoñ meñ aa ga.e

maiñ ne hazār sajde kiye haiñ ba-sad-niyāz

jab tere naqsh-e-pā merī rāhoñ meñ aa ga.e

ai ishq jo bhī terī panāhoñ se duur the

jab duur ho ga.e to nigāhoñ meñ aa ga.e

'sādiq' nasīb hogī mujhe sub.h-e-ārzū

vo shaam hī se merī nigāhoñ meñ aa ga.e

ek do qadam bhi jo teri rahon mein aa gae

wo KHush-nasib teri panahon mein aa gae

husn-o-jamal-e-dost ka aalam na puchhiye

jalwa simaT ke meri nigahon mein aa gae

jine na dete hum ko zamane ke hadse

achchha hua ki teri panahon mein aa gae

dil ko mataa-e-rahat-o-taskin mil gai

wo muskura ke jab bhi nigahon mein aa gae

zarf-e-nazar ki baat hai hum un ki bazm se

kaif-e-hayat le ke nigahon mein aa gae

dair-o-haram mein chal diye dair-o-haram ke log

jo rind the wo teri panahon mein aa gae

main ne hazar sajde kiye hain ba-sad-niyaz

jab tere naqsh-e-pa meri rahon mein aa gae

ai ishq jo bhi teri panahon se dur the

jab dur ho gae to nigahon mein aa gae

'sadiq' nasib hogi mujhe subh-e-arzu

wo sham hi se meri nigahon mein aa gae