مقامِ عشق میں یہ مرتبہ خریدا ہے

مقامِ عشق میں یہ مرتبہ خریدا ہے

خودی کو بیچ کے ہم نے خدا خریدا ہے

جھکا دیا ہے جبیں کو درِ حقیقت پر

اسی ہنر سے تو بابِ رضا خریدا ہے

امیرِ شہر کو حسرت ہے میرے سودے پر

مکاں کو بیچ کے اب راستہ خریدا ہے

سراب و خواب کی بستی سے ہجرتیں کر کے

عدم کے دیس میں اپنا پتا خریدا ہے

چراغِ جاں کو جلایا ہے خونِ دل دے کر

ہوائے دہر سے لڑ کر دیا خریدا ہے

ستارے مانگ کے لائے ہیں آسمان سے ہم

اندھیری رات سے نورِ دعا خریدا ہے

جلے ہیں دھوپ میں تب جا کے سائبان ملا

تپش کے بدلے ہی ابرِ عطا خریدا ہے

لٹا کے اپنی جوانی کی کل کمائی کو

فقیرِ وقت نے دستِ شفا خریدا ہے

عجب سکون ملا ہے ہمیں فقیری میں

قبا کو بیچ کے اب بوریا خریدا ہے

اسی کی راہِ طلب میں جبین رکھ کے فیاضؔ

زمیں کی خاک سے ہم نے سما خریدا ہے