نہ طوطی شکرستاں ہوں میں نہ بلبل زار

نہ طوطی شکرستاں ہوں میں نہ بلبل زار

نہ شمع بزم ہوں میں اور نہ مرغِ آتش خوار

کیا بتوں کے تلون نے جی پہ عرصہ تنگ

ثبات بات کو ان کے نہ میرے جی کو قرار

غلط ہے گر کوئی مریخ کو کہے جلاد

کہ میرے حق میں تو زہرہ بھی ہوگئی خونخوار

ہوں غم نصیب یاں تک کہ اب کے سال ہوا

ہلالِ عید مرے حق میں مغربی تلوار

جو بھاگوں میں جگر خستہ تو کدھر بھاگوں

کہ سنگِ حادثہ کی ہر طرف سے ہے بوچھار

امید بہتری اب تک خیال باطل ہے

کہ سب کا اس فلک بے مدار پر ہے مدار

ہزار معنی باریک دل میں رکھتا ہوں

ہزار نالۂ موزوں کا لب پہ ہے مزمار

زمین پاؤں کے نیچے سے نکلی جاتی ہے

نہیں ہے میری دعا کو بھی آسماں پر بار