شعور مے کدہ پاتے تو آتے

شعور مے کدہ پاتے تو آتے

جو زاہد خود سے ٹکراتے تو آتے

نہ کچھ جذبات دل کے لب پہ آئے

نہ رعب حسن میں آتے تو آتے

نہ آئے قیس مشرب گلستاں میں

جو صحرا سا سکوں پاتے تو آتے

زمیں پر آسماں سے چاند تارے

اشارہ آپ کا پاتے تو آتے

نہ آئے ان کو آداب محبت

ہماری بزم میں آتے تو آتے

وہ خود میں ان چھوا سا حسن ٹھہرے

ہمارا عشق بن جاتے تو آتے

تمہارے پاس آئینہ تھا امجدؔ

تم اس کو اس سے ملواتے تو آتے