غضب سکہ جما ہے حسن عالمگیر جاناں کا

غضب سکہ جما ہے حسن عالمگیر جاناں کا

یدِ قدرت نے دروازہ کیا ہے بند امکاں کا

نہ سمجھے کوئی خطِ وصل خط رخسار جاناں کا

دکھاتا ہے یہ باغ سبز سبزہ اس گلستاں کا

گلا کٹوائے گا غم ایک دن ابروئے جاناں کا

بنے گا حلق پر خنجر ہلال اپنے گریباں کا

بہار بے خزاں ہے جلوہ حسن روئے جاناں کا

ملا ہے روضۂ رضواں سے ڈانڈا اس گلستاں کا

ہوا اس طرح عرس اے گل ترے وحشی عریاں کا

تبرک کی طرح ٹکڑا بٹا جیب و گریباں کا

بہت اب پائوں پھیلاتا ہے سودا اُس گریباں کا

گریباں سے گلے ملنے چلا ہے چاک داماں کا

جنونِ عشق میں سودا کسے سیر گلستاں کا

لگا رہتا ہے اپنے پائوں سے دامن بیاباں کا

ہوا صد چاک دل وارفتہ ہوکر روئے جاناں کا

الٰہی منتشر ہونے لگا شیرازہ قرآں کا

بہار آتے ہی جلوہ رنگ لایا روئے جاناں کا

کُھلا ہے بابِ پنجم صحنِ گلشن میں گلستاں کا

کلی خاموش، گل نے پردۂ خجلت میں منھ ڈھانکا

کسی کو دیکھ کر نقشہ دگرگوں ہے گلستاں کا

یہاں تک نفی ہستی کی ہے عاشق نے کہ سینے پر

دوشاخ ’’لا‘‘ بنا ہے چاک دامان و گریباں کا

دل شیدا بنا ہے درس گاہِ خود فراموشی

کتابِ عشق میں درس ان دنوں ہے بابِ نسیاں کا

خدا رکھے تمھارے خنجر پُر آب کے دم کو

دعا دیتے ہیں عاشق پی کے پانی آبِ حیواں کا

خیال زلف میں مری سحر بھی شام ہی سی ہے

مرے روز سیہ میں رنگ ہے شبہائے ہجراں کا

شب غم بخت کی برگشتگی بھی لطف دیتی ہے

مری آنکھوں میں نقشہ ہے تری زلفِ پریشاں کا

حیاتِ جاوداں پاتے ہیں آبِ تیغ سے عاشق

تیری تلوار سے ہے نام زندہ آبِ حیواں کا

شبِ فرقت عجب رونق ہے میری آہِ سوزاںسے

ذرا آکر تماشا دیکھیے سرو چراغاں کا

نہیں کم ہوتی صبح وصل بھی دل کی پریشانی

کہ زلفیں پیش کردیتی ہیں نقشہ شام ہجراں کا

بتوں کا ہاتھ کعبہ کی طرف بھی بڑھ چلا دیکھو

خدا حافظ ہے اب شیخ حرم کے دین و ایماں کا

یہی حسرت ہے کوئی پوچھتا، ہم ماجرا کہتے

عنایتہائے دشمن کا نوازشہائے درباں کا

لگاتار ایسے بڑھ کر ہاتھ مارے دستِ وحشت نے

کہ اب تو نام بھی باقی نہیں تارِ گریباں کا

ہمیشہ عاشقِ نالاں کے چکر ہی میں پھرتاہے

مگر سر پھر گیا ہے پیر ہو کر چرخِ گرداں کا

اسی منھ پر چلا تھا ہمسری کو روئے روشن سے

ہوائی اڑ رہی ہے منھ تو دیکھو ماہِ تاباں کا

ہمیں صحرائے وحشت میں بھی حاصل سرفرازی ہے

قدم لیتا ہے بڑھ کر چاک دامان و گریباں کا

جدائی جیتے جی ممکن نہیں تھی دستِ وحشت سے

کیا ہے قطعِ رشتہ موت نے تار گریباں کا

فنا ہو کر حیاتِ جاوداں پائی ہے فانی ؔنے

مگر پانی تری تلوار میں ہے آبِ حیواں کا