بشکل نقشِ قدم رفتۂ خرام ہوں میں

بشکل نقشِ قدم رفتۂ خرام ہوں میں

خدا جو چاہے تو اب فائزالمرام ہوں میں

سمندِ عمرِ رواں غافلوں سے کہتا ہے

نہ پائے گرد بھی کوئی وہ تیز گام ہوں میں

کسی کے غم میں ہمیشہ بجھا ہی رہتا ہوں

چراغ گور غریباں کا وقت شام ہوں میں

جنوں کا سلسلہ چمکا ہے میری وحشت سے

جنابِ عشق کا روشن ہے جس سے نام ہوں میں

یہ پائے مالوں سے کہتا ہے اس کانقش قدم

پڑا ہوا ہوں مگر محشرِ خرام ہوں میں

خدا پناہ میں رکھے تمھارے اَبرو سے

یہ کہہ رہا ہے ہر اک تیغِ بے نیام ہوں میں

یہ بے خودوں سے تری چشم مست کہتی ہے

کہو شراب اگر عشق کو تو جام ہوں میں

وہ رشک مہر لب بام سے یہ کہتا ہے

نہ ہو غروب وہ خورشید طرفِ بام ہوں میں

یہ کہہ رہی ہیں وہ آنکھیں جم و سکندر سے

جو روئے یار کا آئینہ ہو وہ جام ہوں میں

مزا ہوا جو پکارا کسی نے دشمن کو

نکل کے میں نے کہا آپ کا غلام ہوں میں