خبر جھوٹی نہیں قاصد کہ وہ ہم سے کشیدہ ہیں

خبر جھوٹی نہیں قاصد کہ وہ ہم سے کشیدہ ہیں

کشش حرفوں کی ایسی ہے کہ ہم بھی صاد کرتے ہیں

بھلا میں اور ذکرِ وصل دشمن خیر ہے صاحب

یہ کیا ارشاد ہوتا ہے؟یہ کیا ارشاد کرتے ہیں

ملا کر خاک میں بھی کیا غبارِ دل نہیں نکلا

شہید عشق کی مٹی بھی برباد کرتے ہیں

فنا کے بعد بھی دل کو لگی ہے رشک دشمن کی

تمھاری مہربانی کو ہم اب تک یاد کرتے ہیں

کسی کے جور پنہاں رفتہ رفتہ رنگ لائے ہیں

مری فریاد سے کرّ و بیاں فریاد کرتے ہیں

حریم ناز میں دخل دوئی ممکن نہیں فانیؔ

جو خود کو بھول جاتے ہیں انھیں وہ یاد کرتے ہیں