جس پر ہمیشہ جور حسیناں ہوا کرے

جس پر ہمیشہ جور حسیناں ہوا کرے

گھٹ گھٹ کے مر نہ جاوے تو انساں کیا کرے

اللہ میرے جذبۂ الفت میں دے اثر

ہو جائے رام وہ بت کافر خدا کرے

یہ ظلم و جور خلق پہ اللہ کی پناہ

ایسا کوئی نہیں کہ فلک کی سزا کرے

ہے باغ بھی نمونہ نیرنگ روزگار

شبنم کہیں پہ روئے کہیں گل ہنسا کرے

آفت میں جاں پھنسائی پڑے کون پیچ میں

زلفِ بتاں کا عشق ہماری بلا کرے

دل کی جگہ پہ پائے بھی پتھر تو آدمی

کیوں کر ہزار طرح کے صدمے سہا کرے

مارے چھری کلیجے میں کھا جائے کیوں نہ زہر

آ جائے تنگ زیست سے انساں تو کیا کرے

آتے ہی اس نے لوٹ لیے صبر و عقل و ہوش

اب آگے آگے دیکھیے یہ عشق کیا کرے

کب کس کی سنتے ہیں یہ بت بے وفا فصیحؔ

ناقوس لاکھ دیر میں نالے کیا کرے