ان اپنے ہاتھوں سے ساغر مجھے پلا تو سہی

ان اپنے ہاتھوں سے ساغر مجھے پلا تو سہی

لگی ہے دل میں جو ظالم اسے بجھا تو سہی

بنے گی کیوں کہ سراپا کی اس طرح تصویر

پڑا ہوا ہے جو پردہ، اسے اٹھا تو سہی

اس آئینہ میں نظر آئے گا خدا تجھ کو

دوئی کے زنگ کو سینہ سے تو ہٹا تو سہی

قبولیت جسے کہتے ہیں، دوڑی آئے گی

دعا کے واسطے ہاتھوں کو تو اٹھا تو سہی

ہلال کوئی کہے گا تو کوئی پھول مجھے

غمِ فراق میں پورا مجھے گھلا تو سہی

نہ دیں بہشت جو تجھ کو فراقؔ سے کہنا

غمِ حسین میں آنسو کوئی بہا تو سہی