gahe idhar ki fikr hai gahe udhar ki hai

gaahe idhar kī fikr hai gaahe udhar kī hai

miTTī ġharaz ḳharāb jahāñ meñ bashar kī hai

ma.asūm ko bhī naza.a hai hargiz nahīñ mafar

mazlūm kī duā ko bhī hājat asar kī hai

choTī meñ aur juuḌe meñ zālim ke farq hai

ye raah umr-bhar kī hai vo sāl-bhar kī hai

gul-gīr kā ḳhatar to patañgoñ kī hai ḳhalish

aafat meñ jaan shaam se sham-e-sahar kī hai

ujḌī paḌī haiñ turbateñ shāhān-e-dahr kī

phūloñ kī chādareñ haiñ na battī agar kī hai

hotā hai zindagī kā koī dam meñ faisla

din-bhar kī baat hai na pahar-do-pahar kī hai

qudrat to chār-sū tirī raushan hai dahr meñ

hājat na shams kī na zarūrat qamar kī hai

qātil vo shāḳh hai tirī ye teġh-e-ābdār

jis ko na gul kā ġham hai na hājat samar kī hai

sab kuchh ḳhudā ne mujh ko diyā 'arsh' be-talab

duḳhtar kī aarzū na tamannā pisar kī hai

ai 'arsh' aao ḳhaak meñ dillī ke so raheñ

miT kar bhī ḳhvāb-gāh ye ahl-e-hunar kī hai

gahe idhar ki fikr hai gahe udhar ki hai

miTTi gharaz KHarab jahan mein bashar ki hai

masum ko bhi naza hai hargiz nahin mafar

mazlum ki dua ko bhi hajat asar ki hai

choTi mein aur juDe mein zalim ke farq hai

ye rah umr-bhar ki hai wo sal-bhar ki hai

gul-gir ka KHatar to patangon ki hai KHalish

aafat mein jaan sham se sham-e-sahar ki hai

ujDi paDi hain turbaten shahan-e-dahr ki

phulon ki chadaren hain na batti agar ki hai

hota hai zindagi ka koi dam mein faisla

din-bhar ki baat hai na pahar-do-pahar ki hai

qudrat to chaar-su teri raushan hai dahr mein

hajat na shams ki na zarurat qamar ki hai

qatil wo shaKH hai teri ye tegh-e-abdar

jis ko na gul ka gham hai na hajat samar ki hai

sab kuchh KHuda ne mujh ko diya 'arsh' be-talab

duKHtar ki aarzu na tamanna pisar ki hai

ai 'arsh' aao KHak mein dilli ke so rahen

miT kar bhi KHwab-gah ye ahl-e-hunar ki hai