غفلت نہ تھی تصور دیدار یار تھا

غفلت نہ تھی تصور دیدار یار تھا

نظارۂ جمال میں گم انتظار تھا

ہوں عالم سکوں میں کہ عالم سکوں میں ہے

میں بے قرار تھا کہ جہاں بے قرار تھا

تھی صورت حجاب حقیقت نگاہ کی

جو راز آشکار نہ تھا آشکار تھا

ساقی تیری شراب میں یہ خاص بات تھی

نشہ بقدر حوصلۂ بادہ خوار تھا

کوئی گناہ ہوش سے بڑھ کر نہیں گناہ

جو مست ہو گیا وہ بڑا ہوشیار تھا

میں ہو گیا غبار رہ دوست اے ذہینؔ

پھر بھی کسی کی خاطر نازک پہ بار تھا