کوچے سے ترے دل مجھے جانے نہیں دیتا

کوچے سے ترے دل مجھے جانے نہیں دیتا

اسباب سفریاں سے اٹھانے نہیں دیتا

ہے رشک فلک کو مرے اوقات پہ یاں تک

غم کھاؤں تو غم بھی مجھے کھانے نہیں دیتا

شانے نے زبس ان کو اجارے میں لیا ہے

زلفوں کو ترے ہاتھ لگانے نہیں دیتا

یارب کہ شتاب اس کے اجل سامنے آئے

جو تجھ کو مرے سامنے آنے نہیں دیتا

کہتے ہیں کہ پھر فصل گل آئی ہے چمن میں

کیوں دست جنوں دھوم مچانے نہیں دیتا

دشمن ہے یہاں تک کہ نسیم اور صبا کو

تربت پہ مری پھول چڑھانے نہیں دیتا

اے مصحفیؔ سمجھا تو ہی اس دست جنوں کو

مجھ کو یہ گریبان سلانے نہیں دیتا