ٹوٹ جائے نہ بھرم، مجھ پہ عنایت کرنا

ٹوٹ جائے نہ بھرم، مجھ پہ عنایت کرنا

ہو نہ رسوائی کہیں میری حفاظت کرنا

بس اسی واسطے میں ڈھونڈھ رہا ہوں تجھ کو

میرا مقصد ہے فقط تیری زیارت کرنا

اک نظر میں مجھے دیوانہ بنانے والے

جیسے جی چاہے مرے دل پہ حکومت کرنا

تیرے افعال پہ میں اپنی نظر کیوں ڈالوں

ہے مرا کام فقط تجھ سے محبت کرنا

رند ہی رند نظر آئیں جہاں پر ناصح

اس جگہ سوچ سمجھے کر ہی نصیحت کرنا

آج بے پردہ انہیں دیکھ کے یہ لگتا ہے

چاہتے ہیں وہ بپا کوئی قیامت کرنا

مذہب عشق نے شبیرؔ سکھایا ہے یہی

دل جہاں کہہ دے اسی در پہ عبادت کرنا