پھر بتِ بدمست میرا نَے نوازی کرتا ہے

پھر بتِ بدمست میرا نَے نوازی کرتا ہے

کس اچھوتے نقش سے جادو طرازی کرتا ہے

سارا عالم سربسر ہے اس کی زلفوں کا اسیر

دیکھا اس کالے کو کیسے ترک تازی کرتا ہے

شرم سے محجوب ہوں اس کے خیالوں کے طفیل

آنکھوں میں بستا ہے وہ مردم نوازی کرتا ہے

دور سے کرتا ہے وہ شاید اشارے اس طرح

جیسے انگلی پھیر کر شیریں نوازی کرتا ہے

خونِ خسرو میں رواں ہے وہ صنم دامن کشاں

اور اس دامن پہ سجدہ بھی نمازی کرتا ہے