کوئی ستم آشنا نہیں ہے

کوئی ستم آشنا نہیں ہے

اب جینے کا کچھ مزا نہیں ہے

بے لطف ہے اپنی زندگانی

اب ہم سے کوئی خفا نہیں ہے

ویرانی دل بیاں کروں کیا

اب درد کا بھی پتا نہیں ہے

قائم رہی ہے جفا پہ اپنی

تم سا کوئی با وفا نہیں ہے

شکوہ ہے جفاؤں کا تمہاری

تم سے تو کوئی گلا نہیں ہے

ہر قلب غم آشنا ہے لیکن

ہر غم، غم آشنا نہیں ہے

غم کی کوئی ابتدا نہیں تھی

غم کی کوئی انتہا نہیں ہے

امیدِ وفا پہ جینے والو!

امید وفا، وفا نہیں ہے

ملتے نہیں کیوں حفیظؔ سے آپ

ایسا بھی تو وہ برا نہیں ہے