زمیں والوں کا ہو غماز رنگِ آسماں کب تک

زمیں والوں کا ہو غماز رنگِ آسماں کب تک

شفق افسانۂ جورِ بتاں کی سرخیاں کب تک

حدودِ ظاہری میں یہ تری دلچسپیاں کب تک

حقیقت میں میں نگاہیں ہیں تو سعیٔ رائیگاں کب تک

سلامت گردشیں ہیں تو نشانِ رفتگاں کب تک

رہیں گے یہ مرقعے عبرت افزائے جہاں کب تک

گزر جا کاروان ہستیٔ فانی سے بھی غافل

کہ ان بیداریوں میں لذتِ خوابِ گراں کب تک

نیازِ مستقل سے ناز گو پامال ہونا ہے

سلامت ہیں مرے سجدے تو سنگِ آستاں کب تک

نشیمن سوزیوں میں بھی چمن کا پاس لازم ہے

چراغِ برق سے روشن رہے گا آشیاں کب تک

مٹا دینی ہے حسن و عشق کی تفریق بھی اک دن

نیاز و ناز کے پردے رہیں گے درمیاں کب تک

دو عالم کی حدیں معلوم لیکن دیکھنا یہ ہے

مرے قالب میں رہتا ہے ترا امرِ نہاں کب تک

جوانی کھو کے اب پیری کا غم بے سِود ہے نشترؔ

چھٹا جب کارواں ہم سے تو گردِ کارواں کب تک