اس کی فرقت میں مزا یہ ہے کہ روتا جاؤں

اس کی فرقت میں مزا یہ ہے کہ روتا جاؤں

گوہر اشک میں تا عمر پروتا جاؤں

روتے روتے میرے آنکھوں سے ہو دریا جاری

داغ عصیاں کو اسی آب کے دھوتا جاؤں

اس کے کوچے میں پہنچ کر یہ کہوں کیا اے شیوخ

دانۂ دل اسی کو خاک میں بوتا جاؤں

وہ طلب مجھ کو کریں ہو یہی حالت میری

جب چلوں سامنے اس بت کے تو روتا جاؤں

مرمٹوں عشق میں ایسا کہ پتہ تک نہ رہے

اس کو پیدا کروں اور آپ کو کھوتا جاؤں

واہ شاباش یہی کام ہے اچھا احقرؔ

فرقت یار میں تاعمر میں روتا جاؤں