ہم یہ کیف غمزۂ حسن بصر دیکھا کیے

ہم یہ کیف غمزۂ حسن بصر دیکھا کیے

آ کے جلوے دیدۂ فطرت نگر دیکھا کیے

اک فریب جلوہ تھا چشم بصیرت کے لیے

اے کلیم اللہ تم کیا طور پر دیکھا کیے

اس حقیقت آشنا کی ہیں تبسم ریزیاں

جن کو ہم افلاک پر شمس و قمر دیکھا کیے

راز دارِ نور عرفاں کی جبینِ شوق میں

مضطرب ہو ہو کے سجدے اپنا گھر دیکھا کیے

واقفانِ رازِ الفت سے جو پوچھا ماجرا

ہنس کے میرا حوصلہ میرا جگر دیکھا کیے

اک تماشائے نظر ہے یہ جہانِ رنگ و بو

اس لیے تحقیر سے اہل نظر دیکھا کیے

اف رے بیتابِ تماشا، کچھ تجھے بھی ہوش تھا

آکے جب جلوے ترا ذوقِ نظر دیکھا کیے

اپنی شرمِ عصیاں کاری سے ہوئے وہ کامگار

جو شبِ تاریک میں لطفِ سحر دیکھا کیے

سب حقیقت فاش تھی اس عالم نیرنگ کی

جب طلسمِ جلوہ اس کا با خبر دیکھا کیے

اس جہانِ معرفت میں جب کہ جا پہنچا فہیمؔ

دیدۂ حیرت نگر سے ہم سفر دیکھا کیے