کبھی خلقت تماشائی نہ ہوتی

کبھی خلقت تماشائی نہ ہوتی

جو تجھ میں حسن آرائی نہ ہوتی

جو ان کی جلوہ فرمائی نہ ہوتی

نہ ہوتی یوں جبیں سائی نہ ہوتی

اگر جاتے نہ کوہِ طور پر تم

تو موسیٰ جلوہ فرمائی نہ ہوتی

نہ ہوتا عذر سَم کھانے میں ہم کو

اگر تیری قسم کھائی نہ ہوتی

جو عالم گیر حسنِ بت نہ ہوتا

خدائی اس کی شیدائی نہ ہوتی

اگر منظور ہوتا مجھ سے پردہ

تو چلمن اس نے اٹھوائی نہ ہوتی

اگر حامدؔ تغافل وہ نہ کرتے

شکایت تا بلب آئی نہ ہوتی