faqat hai raat bhar ki is chaman mein mehman shabnam

faqat hai raat bhar kī is chaman meñ mehmāñ shabnam

sahar hote jahāñ sūraj nikal aayā kahāñ shabnam

ġham-o-shādī meñ tavām dekh nairañg-e-chaman bulbul

idhar gul-kHanda-zan haiñ aur udhar girya-kunāñ shabnam

buland-o-past sab meñ hai usī kī raushnī phailī

falak par jalva-gar taare zamīñ par darafshāñ shabnam

sabā to nighat-e-gul kā batātī hai patā lekin

batāyā ye bhī ga.ī be-bāl-o-par uḌ kar kahāñ shabnam

gul taaza havā hai koī pāmāl-e-ḳhizāñ shāyad

ye kis ke sog meñ haiñ yuuñ tire aañsū ravāñ shabnam

kahāñ kāmil kahāñ nāqis kahāñ dariyā kahāñ qatra

kahāñ a.alā kahāñ adnā kahāñ sūraj kahāñ shabnam

'shafaq' abr-e-karam kā shāmiyāna hogā turbat par

chaḌhāe.gī lahad par chādar āb-e-ravāñ shabnam

faqat hai raat bhar ki is chaman mein mehman shabnam

sahar hote jahan suraj nikal aaya kahan shabnam

gham-o-shadi mein tawam dekh nairang-e-chaman bulbul

idhar gul-kHanda-zan hain aur udhar girya-kunan shabnam

buland-o-past sab mein hai usi ki raushni phaili

falak par jalwa-gar tare zamin par darafshan shabnam

saba to nighat-e-gul ka batati hai pata lekin

bataya ye bhi gai be-baal-o-par uD kar kahan shabnam

gul taza hawa hai koi pamal-e-KHizan shayad

ye kis ke sog mein hain yun tere aansu rawan shabnam

kahan kaamil kahan naqis kahan dariya kahan qatra

kahan aala kahan adna kahan suraj kahan shabnam

'shafaq' abr-e-karam ka shamiyana hoga turbat par

chaDhaegi lahad par chadar aab-e-rawan shabnam