فقط ہے رات بھر کی اس چمن میں میہماں شبنم

فقط ہے رات بھر کی اس چمن میں میہماں شبنم

سحر ہوتے جہاں سورج نکل آیا کہاں شبنم

غم و شادی میں توام دیکھ نیرنگ چمن بلبل

ادھر گل خندہ زن ہیں اور ادھر گریہ کناں شبنم

بلند و پست سب میں ہے اسی کی روشنی پھیلی

فلک پر جلوہ گر تارے زمیں پر درفشاں شبنم

صبا تو نگہت گل کا بتاتی ہے پتا لیکن

بتایا یہ بھی گئی بے بال و پر اڑ کر کہاں شبنم

گل تازہ ہوا ہے کوئی پامال خزاں شاید

یہ کس کے سوگ میں ہیں یوں ترے آنسو رواں شبنم

کہاں کامل کہاں ناقص کہاں دریا کہاں قطرہ

کہاں اعلیٰ کہاں ادنیٰ کہاں سورج کہاں شبنم

شفقؔ ابر کرم کا شامیانہ ہو گا تربت پر

چڑھائے گی لحد پر چادر آب رواں شبنم