moattar pa ke bu-e-husn se sara badan apna

mo.attar pā ke bū-e-husn se saarā badan apnā

vo sūñghā karte haiñ ḳhud bhī aksar pairahan apnā

raqīboñ kī hamāre ba.ad ab itnī bhī kyā kasrat

kabhī tum ġhaur se dekho to rañg-e-anjuman apnā

irāda aaj be-ḳhauf-o-ḳhatar hai un kī mahfil kā

mohabbat meñ koī dekhe to ye dīvāna-pan apnā

kuchh is aalam meñ vo be-parda nikle sair-e-gulshan ko

ki nasrīñ apnī ḳhushbū rañg bholī nastaran apnā

vo rahm aayā tujhe majbūrī-e-shauq-e-shahādat par

ḳhabar le haath kī ḳhanjar sambhāl ai teġh-zan apnā

hameñ ma.alūm hai sab haal us ke husn-e-abtar kā

banāo itnā na dikhlā.e vo zulf-e-pur-shikan apnā

sabhī kuchh ho gayā un kā hamārā kyā rahā 'hasrat'

na diiñ apnā na dil apnā na jaañ apnī na tan apnā

moattar pa ke bu-e-husn se sara badan apna

wo sungha karte hain KHud bhi aksar pairahan apna

raqibon ki hamare baad ab itni bhi kya kasrat

kabhi tum ghaur se dekho to rang-e-anjuman apna

irada aaj be-KHauf-o-KHatar hai un ki mahfil ka

mohabbat mein koi dekhe to ye diwana-pan apna

kuchh is aalam mein wo be-parda nikle sair-e-gulshan ko

ki nasrin apni KHushbu rang bholi nastaran apna

wo rahm aaya tujhe majburi-e-shauq-e-shahadat par

KHabar le hath ki KHanjar sambhaal ai tegh-zan apna

hamein malum hai sab haal us ke husn-e-abtar ka

banao itna na dikhlae wo zulf-e-pur-shikan apna

sabhi kuchh ho gaya un ka hamara kya raha 'hasrat'

na din apna na dil apna na jaan apni na tan apna