کار کلید گر مرا دستِ دعا کرے

کار کلید گر مرا دستِ دعا کرے

بے قصد قفل باب اجابت کھلا کرے

الٹا اثر کبھی شبِ فرقت دعا کرے

بزمِ عدو سے وہ ادھر آئے خدا کرے

اظہار مدعا پہ زباں کیا رہے خموش

مطلب جو چھیڑ چھاڑ سے حاصل ہوا کرے

دم دے کے تیغ ناز بتاں سے جو لوں میں دم

تا مر کے پھر سے جینے کی لذت ملا کرے

پہنچا دوں دست شوق گریباں کے متصل

وہ بت ہجوم حشر میں آئے خدا کرے

بیدل لکھے گا کاتبِ اعمال میرا نام

قابو میں دل اگر نگہ دلربا کرے

مل جائے دودِ آہ میں گر کچھ غبارِ دل

ہر روز اس گلی میں بگولہ اڑا کرے

کاری لگے نہ تیغ تغافل کا جب کہ وار

رہ رہ کے درد دل میں ہمیشہ اٹھا کرے

آئے تو اس کے سمت خدنگِ نگاہ ناز

تعظیم اٹھ کے دردِ دل باوفا کرے

دم تھا شریک حال سو وہ بھی ہوا ہے غیر

تسکین دل کی یاس شب ہجر کیا کرے

آنکھوں کو دوں جو گریہ فرقت کا مشورہ

ہر رات گھر سے نوح کا طوفاں اٹھا کرے

بر گشتہ بختیوں کا نتیجہ ہے یہ ہلالؔ

ہو جس سے کچھ امیدِ وفا وہ دغا کرے