mile jo tu mile apni raza se

mile jo tū mile apnī razā se

ulajh paḌtā huuñ maiñ apnī du'ā se

tire bīmār kī vahshat 'ajab hai

ġharaz us ko du'ā se na davā se

dar-e-jānāñ chhuTā hai na chhuTegā

zamāna jo kahe merī balā se

mohabbat ziist hai 'uqda nahīñ hai

ye hal hotī nahīñ fikr-e-rasā se

jo mar miTtā hai tujh kāfir-adā par

kahāñ martā hai vo zālim qazā se

kahāñ maiñ aur kahāñ terī tamannā

ye ne'amat bhī milī terī 'atā se

mirī ḳhalvat meñ aatā hai vo dilbar

hazāroñ ishva se lākhoñ adā se

sabā ko naaz hai mahshar-ḳhirāmī

milī hai us ko tere naqsh-e-pā se

jamāl-e-yār kā rañgīñ fasāna

bayāñ kyuuñ ho kisī tarz-e-adā se

mire sar ko mile ik but ke sajde

mujhe kyā kaam hai 'imrān ḳhudā se

mile jo tu mile apni raza se

ulajh paDta hun main apni du'a se

tere bimar ki wahshat 'ajab hai

gharaz us ko du'a se na dawa se

dar-e-jaanan chhuTa hai na chhuTega

zamana jo kahe meri bala se

mohabbat zist hai 'uqda nahin hai

ye hal hoti nahin fikr-e-rasa se

jo mar miTta hai tujh kafir-ada par

kahan marta hai wo zalim qaza se

kahan main aur kahan teri tamanna

ye ne'amat bhi mili teri 'ata se

meri KHalwat mein aata hai wo dilbar

hazaron ishwa se lakhon ada se

saba ko naz hai mahshar-KHirami

mili hai us ko tere naqsh-e-pa se

jamal-e-yar ka rangin fasana

bayan kyun ho kisi tarz-e-ada se

mere sar ko mile ek but ke sajde

mujhe kya kaam hai 'imran KHuda se