جس کی طرف نگاہ طلب دلربا کرے

جس کی طرف نگاہ طلب دلربا کرے

بیچارہ جبر سہہ کے نہ دے دل تو کیا کرے

عاشق نے جان و دل کو جو وارا تو کیا کیا

کچھ اور اس سے بڑھ کے اگر ہو فدا کرے

کس طرح مجھ سے پیچھا چھڑاتا وہ نازنیں

ممکن نہ تھا ردیف کو وہ قافیہ کرے

سوزِ دروں سے خانۂ دل میں لگی ہے آگ

اللہ تیرا گھر ہے کہاں تک جلا کرے

فرقت کا غم شماتت ہمسایہ جور غیر

یہ آفتیں جدا ہیں ستم وہ جدا کرے

پہنچا دے کوئے یار میں مشتِ غبار کو

احسان میری خاک پہ اتنا صبا کرے

آنچل ترے دوپٹہ کا کیوں کر چھپا سکے

جوبن ابھر ابھر کے جو نشو و نما کرے

بحرِ الم میں کشتی دل کی الٰہی خیر

پہلو تہی خدا نہ کرے نا خدا کرے

امیدوار میں بھی ہوں انعامؔ غیر بھی

جس کو نصیب وصل کی دولت عطا کرے