کیوں خوشی تم کو ہوئی حالِ پریشاں دیکھ کر

کیوں خوشی تم کو ہوئی حالِ پریشاں دیکھ کر

ہنس رہے ہو کیوں مرے زخموں کو خنداں دیکھ کر

دو دلوں کی دھڑکنوں کا نام الفت رکھ دیا

جان پروانے دیئے ہیں شمع سوزاں دیکھ کر

دست قدرت نے بنایا ہے انہیں اک شاہکار

آئینہ حیراں نہ کیوں ہو شانِ یزداں دیکھ کر

سیر گلشن میری قسمت میں نہیں ہے تو نہ ہو

جی رہا ہوں دور سے صحن گلستاں دیکھ کر

ان کو اپنی بزم کا اس پر گماں ہونے لگا

داغ دل کو میرے سینے سے چراغاں دیکھ کر

کم کہیں ہوتا ہے ان باتوں سے اندازِ جنوں

اور ہمت بڑھ گئی زنجیر زنداں دیکھ کر

بس رہی ہے آنکھ میں ہردم بہار کوئے دوست

کیا کریں گے اے شفقؔ ہم باغِ رضواں دیکھ کر