insaniyat na jis mein ho wo aadmi nahin

insāniyat na jis meñ ho vo aadmī nahīñ

jis meñ huzūr qalb na ho bandagī nahīñ

jis meñ junūn-e-shauq na ho āshiqī nahīñ

dil kā mo.āmla hai koī dil-lagī nahīñ

rahtā hai mere darpai-e-āzār phir bhī vo

us se agarche merī koī dushmanī nahīñ

rātoñ kī niiñd din kā sukūñ ho gayā harām

pūchhā jo kab miloge to bolā kabhī nahīñ

ḳhvābīda hasratoñ kā na ho jis meñ in.ikās

hai kārgah-e-shīshagarī shā.erī nahīñ

us kī sharāb-e-nāb se baḌh kar hai chashm-e-mast

jis ke baġhair lutf-e-mai-o-mai-kashī nahīñ

naqd-e-suḳhan jo karatā hai vo ho suḳhan-shanās

jauhar-shanās ho na agar jauharī nahīñ

'barqī' jo ḳhud-shanās hai vo hai ḳhudā-shanās

gum-gashtagī-e-hosh-o-ḳhirad be-ḳhudī nahīñ

insaniyat na jis mein ho wo aadmi nahin

jis mein huzur qalb na ho bandagi nahin

jis mein junun-e-shauq na ho aashiqi nahin

dil ka moamla hai koi dil-lagi nahin

rahta hai mere darpai-e-azar phir bhi wo

us se agarche meri koi dushmani nahin

raaton ki nind din ka sukun ho gaya haram

puchha jo kab miloge to bola kabhi nahin

KHwabida hasraton ka na ho jis mein inikas

hai kargah-e-shishagari shaeri nahin

us ki sharab-e-nab se baDh kar hai chashm-e-mast

jis ke baghair lutf-e-mai-o-mai-kashi nahin

naqd-e-suKHan jo karata hai wo ho suKHan-shanas

jauhar-shanas ho na agar jauhari nahin

'barqi' jo KHud-shanas hai wo hai KHuda-shanas

gum-gashtagi-e-hosh-o-KHirad be-KHudi nahin