تیرے در تک جو پہنچا نہیں

تیرے در تک جو پہنچا نہیں

وہ مسافر کہیں کا نہیں

عشق ہے زندگی بھر کا روگ

ایک دو دن کا رونا نہیں

اس نظر کا عتاب الاماں

جو گرا پھر وہ سنبھلا نہیں

ان کی چاہت سے منہ موڑ لیں

یہ انہیں بھی گوارا نہیں

تم کو اس عہد ہی کی قسم

اب کھنچے ہو تو ملنا نہیں

سنگ دل جیسا لگتا ہے وہ

دل سے شاید وہ ایسا نہیں

کیسا شہرِ نگاراں ہے یہ

زیرِ دیوار سایا نہیں

تشنگی بھی بجھے جب ہے بات

ورنہ دریا بھی دریا نہیں

اف یہ عالم ہمارے ہیں سب

اور کوئی ہمارا نہیں

مجھ سے اقبالؔ ہوگی خطا

آدمی ہوں فرشتا نہیں