منزلیں عشق کی الاماں الاماں

منزلیں عشق کی الاماں الاماں

ہر نفس کش مکش ہر قدم امتحاں

کوئی ان سے الگ ہو کے جائے کہاں

زندگی بھی خفا موت بھی بدگماں

یاد کچھ آگیا اشکِ غم تھم گئے

دل نے آواز دی رک گیا کارواں

کیا وہ کچھ اور میرے قریب آگئے

دل پہ ہونے لگی آرزو بھی گراں

ذکر تھا نکہتِ گل کی رفتار کا

یاد آنے لگے آپ کیوں ناگہاں

کتنی شمعیں فروزاں ہیں اس شمع سے

دل جواں ہے تو اک اک نفس ہے جواں

خوب ہے حسن اور عشق کا فاصلہ

منزلِ یک نفس بھی نہیں درمیاں

رنگ نکھرا ہوا زلف بکھری ہوئی

صبح بھی شام بھی کچھ عیاں کچھ نہاں

اس کو اقبالؔ پھر اور کیا چاہیے

جس کو مل جائے قسمت سے وہ آستاں