jab masnad-e-faqr pe baiTh gae shahi ki tamanna kaun kare

jab masnad-e-faqr pe baiTh ga.e shāhī kī tamannā kaun kare

jab mālik-e-kaunain apnā ho kaunain kī parvāh kaun kare

mā'būd agar mash.hūd nahīñ phir tā'at meñ kuchh suud nahīñ

masjūd kī jab tak diid na ho mauhūm ko sajda kaun kare

har ḳhvāhish jaan kī ḳhvāhish hai ḳhvāhish jo na ho āsā.ish hai

suntā nahīñ jab apnī koī phir 'arz-e-tamannā kaun kare

tum aao na aao vā'de par har haal meñ raazī hai 'amjad'

tum jaan aur dil ke mālik ho mālik se taqāzā kaun kare

jab masnad-e-faqr pe baiTh gae shahi ki tamanna kaun kare

jab malik-e-kaunain apna ho kaunain ki parwah kaun kare

ma'bud agar mashhud nahin phir ta'at mein kuchh sud nahin

masjud ki jab tak did na ho mauhum ko sajda kaun kare

har KHwahish jaan ki KHwahish hai KHwahish jo na ho aasaish hai

sunta nahin jab apni koi phir 'arz-e-tamanna kaun kare

tum aao na aao wa'de par har haal mein raazi hai 'amjad'

tum jaan aur dil ke malik ho malik se taqaza kaun kare