جہاں بدلا تو بدلا تو بھی اے جان جہاں بدلا

جہاں بدلا تو بدلا تو بھی اے جان جہاں بدلا

زمیں بدلی تو بدلی تھی غضب ہے آسماں بدلا

مری دنیائے دوں کو تو نے اے پیر مغاں بدلا

قیاس اب ہو گیا عرفاں تمہیں سے اب گماں بدلا

طریق عشق میں گو کارواں پر کارواں بدلا

نہ لیکن رہگزر بدلی نہ میر کارواں بدلا

رہا بار امانت گو وبال دوش رستے بھر

نہ کندھا بھی مگر ہم نے تہ بار گراں بدلا

کروں کیا دل ہے باصد زہد و تقویٰ مائل رندی

جبلت کیا بدل سکتی عمل کو اپنے ہاں بدلا

نہ رہ چھوڑی نہ ہم نے نقش پائے رہ رواں چھوڑے

ہوا کے رخ پہ رخ تو نے تو گرد کارواں بدلا

بہت گو عشق میں مجذوبؔ بدلا تم نے حال اپنا

مگر جیسا بدلنا چاہیے ویسا کہاں بدلا